O‘zbekiston terma jamoasi 10-avgust kuni Toshkentda o‘tayotgan o‘smirlar va yoshlar o‘rtasidagi og‘ir atletika bo‘yicha Osiyo chempionatida 10 ta medalni qo‘lga kiritdi, deya xabar berdi Milliy olimpiya qo‘mitasi.
Jamoa bir kunlik bahslarda uchta oltin, oltita kumush va bitta bronza medaliga sazovor bo‘ldi.
Marjona Abdumutalova yoshlar o‘rtasida 57 kg gacha vazn toifasida dast ko‘tarishda, Ziyoda Xudoyqulova yoshlar o‘rtasida 61 kg gacha vaznda dast ko‘tarishda, Munisa Boltayeva esa o‘smirlar o‘rtasida 61 kg gacha vaznda siltab ko‘tarishda oltin medal oldi.
Zarina Abdullahakova o‘smirlar o‘rtasida 57 kg gacha vaznda dast ko‘tarishda kumush medal oldi. Shu vaznda Abdumutalova yoshlar o‘rtasida siltab ko‘tarish va ikki kurashda yana ikkita kumush medalni qo‘lga kiritdi.
61 kg gacha vazn toifasida Boltayeva o‘smirlar ikki kurashida, Xudoyqulova esa yoshlar siltab ko‘tarishi va ikki kurashida kumush medalga sazovor bo‘ldi.
Boltayeva o‘smirlar o‘rtasida 61 kg gacha vaznda dast ko‘tarishda bronza medalini ham oldi. Shu tariqa, to‘rt nafar sportchi alohida mashqlar va ikki kurashda jamoaga medallar keltirdi.
