O‘zbekistonlik grossmeyster Javohir Sindorov Saint Louis Rapid & Blitz turnirida ikkinchi o‘rinni egallab, 40 ming dollar mukofot oldi, deya xabar berdi Grand Chess Tour.
Sindorov musobaqa davomida ikkinchi o‘rinni saqlab qoldi. Turnir 2026-yilgi Grand Chess Tour seriyasining AQSHdagi birinchi bosqichi bo‘ldi.
Hindistonlik grossmeyster Rameshbabu Pragnanandhaa g‘olib bo‘lib, 50 ming dollar oldi. AQSH vakili Wesley So uchinchi o‘rinni egalladi va 30 ming dollar ishlab oldi.
Seriyaning keyingi bosqichi — Sinquefield Cup 10–19-avgust kunlari Sent-Luisda o‘tkaziladi. Turnirning mukofot jamg‘armasi 475 ming dollarni tashkil etadi.
Bu Grand Chess Tour muntazam mavsumining so‘nggi bosqichi bo‘ladi. Umumiy reytingdagi eng yaxshi to‘rt ishtirokchi 22–27-avgust kunlari 450 ming dollarlik mukofot jamg‘armasi uchun o‘tadigan finalga yo‘l oladi.
