Interpol yo‘nalishi bo‘yicha xalqaro qidiruvda bo‘lgan uch nafar fuqaro Turkiyadan O‘zbekistonga olib kelindi, deb IIV xabar berdi.
Erkaklar Istanbulda qo‘lga olingan. Amaliyot Interpol Milliy markaziy byurosi, Turkiya huquqni muhofaza qiluvchi organlari va O‘zbekiston Bosh konsulxonasi hamkorligida o‘tkazilgan.
Ekstraditsiya qilinganlardan biri Samarqand viloyatida tug‘ilgan 28 yoshli fuqaro. U jinsiy daxlsizlikka qarshi og‘ir jinoyatda ayblanmoqda.
Yana bir shaxs Buxoro viloyatida tug‘ilgan 34 yoshli fuqaro bo‘lib, firibgarlik ishi bo‘yicha ayblanmoqda.
Uchinchi shaxs Toshkentda yashovchi 50 yoshli fuqaro. U juda ko‘p miqdordagi firibgarlikda ayblanmoqda.
Ayblanuvchilar O‘zbekiston huquqni muhofaza qiluvchi organlariga topshirilgach, Toshkentga olib kelindi. Keyingi protsessual qarorlar jinoyat ishlari doirasida qabul qilinadi.
