Shavkat Mirziyoyev fuqarolar va biznes uchun kadastr xizmatlarini soddalashtirishni topshirdi, deya xabar berdi O‘zbekiston prezidentining rasmiy sayti.
Ko‘chmas mulkka bo‘lgan huquqlarni davlat ro‘yxatidan o‘tkazish to‘liq onlayn shaklga o‘tkazilishi rejalashtirilgan. Yiliga qariyb 500 mingta arizani hozirgi 10–15 kun o‘rniga bir necha soniyada rasmiylashtirish imkoniyati yaratiladi.
Xizmatlarni “bitta ariza — bitta to‘lov” tamoyili asosida tashkil etish taklif qilindi. Obyektga huquq paydo bo‘lganda arizaning avtomatik shakllanishi 1,2 mln arizachining vaqt va mablag‘ini tejashi hamda murojaatlar sonini yiliga 200 mingtaga kamaytirishi kutilmoqda.
Ro‘yxatdan o‘tkazish arizasini belgilangan muddatda birinchi marta topshirmaganlik uchun jarima o‘rniga ogohlantirish berish taklif etildi. Egasi noqonuniy qurilmani ixtiyoriy bartaraf etsa, javobgarlikni yumshatish ham rejalashtirilgan.
Respublika darajasida ishlayotgan xodimlarning kamida 30 foizini tuman bo‘linmalariga o‘tkazish ko‘zda tutilgan. Kadastrlar palatasi va xizmat ko‘rsatuvchi tuzilmalarni respublika, viloyat va tuman darajasida birlashtirish taklif qilindi.
O‘zgarishlar davrida bir hafta ichida “Kadastr maslahat burchagi” va “Tezkor kadastr” xizmatlarini yo‘lga qo‘yish topshirildi. Mas’ul tuzilmalar ortiqcha bosqichlar va to‘lovlarni qisqartirishi kerak.
