O‘zbekistonda «Madaniy loyihalar milliy operatori» davlat muassasasi tashkil etildi, bu haqda prezidentning PQ-270-son qarorida qayd etilgan.
Operator Madaniyat va san’atni rivojlantirish jamg‘armasi huzurida Madaniyat vazirligining Xalqaro festivallar direksiyasi negizida tuzildi. Amaldagi moliyalashtirish tartibi saqlanadi.
Muassasa xalqaro va respublika miqyosidagi madaniy tadbirlarni tayyorlaydi, madaniy mahsulotlarni xorijda targ‘ib qiladi hamda chet ellik mutaxassislarni jalb etadi.
2030-yil 1-yanvargacha tadbirlar uchun uskunalar, texnika, musiqa asboblari, rekvizit va boshqa tovarlar bojxona bojidan ozod qilinadi. Ro‘yxatlarni hukumat tasdiqlaydi.
«Sharq taronalari» xalqaro musiqa festivalini 2027-yildan boshlab ikki yilda bir marta o‘tkazish rejalashtirilgan. Qarorda madaniy turizm va xizmatlar eksportini rivojlantirish choralari ham belgilangan.
