O‘zbekistonda 20 iyul kuni sutkalik elektr energiyasi iste’moli rekord 301,9 mln kVt·soatga yetdi, bu haqda Energetika vazirligi xabar berdi.
Yangi ko‘rsatkich o‘tgan yilgi yozgi maksimumdan 29,3 mln kVt·soat yoki 10,75 foiz yuqori bo‘ldi. 18 iyulga nisbatan iste’mol 7,5 mln kVt·soat yoki 2,55 foiz oshdi.
Soat 17:22 da kunduzgi eng yuqori yuklama 14,2 GVtni tashkil etdi. Elektr stansiyalarida 305,4 mln kVt·soat energiya ishlab chiqarildi, bu 18 iyuldagi natijadan 8,3 mln kVt·soat yoki 2,79 foiz ko‘p.
Yuqori yuklama fonida vazirlik 20–21 iyul kunlari Toshkentda jami 3060 iste’molchiga ta’sir qilgan oltita uzilishni sanab o‘tdi:
- Olmazor tumanidagi Sebzor mavzesida 310 iste’molchi — soat 13:47 dan 18:57 gacha;
- Yakkasaroy va Chilonzor tumanlarida 1500 iste’molchi — soat 16:11 dan 16:55 gacha;
- Yashnobod tumanidagi Uysozlar mavzesi va Farg‘ona yo‘li ko‘chasi hududida 350 iste’molchi — soat 16:49 dan 22:00 gacha;
- Chilonzor tumanining 1-mavzesida 300 iste’molchi — soat 17:05 dan 22:03 gacha;
- Sergeli tumanidagi Xonobod va Sultonobod ko‘chalarida 280 iste’molchi; xabarda tiklash vaqti ko‘rsatilmagan;
- Olmazor tumanidagi Sebzor va Taxtapul ko‘chalarida 320 iste’molchi — soat 05:20 dan 07:10 gacha.
Energetika vazirligi energiya tizimi barqaror ishlashda davom etganini bildirdi. Nosozliklarni tezkor bartaraf etish uchun avariya-ta’mirlash brigadalari kuchaytirilgan rejimga o‘tkazildi.
