O‘zbekiston huquqni muhofaza qiluvchi organlari Chorvoq suv ombori bo‘yidagi plyajlar faoliyatiga kuch ishlatib ta’sir ko‘rsatganlikda gumon qilinayotgan ikki guruh faoliyati to‘xtatilganini ma’lum qildi.
Tergov versiyasiga ko‘ra, kelishmovchilikdan so‘ng birinchi guruh a’zolari ikkinchi guruh vakillariga hujum qilib, tan jarohati yetkazgan. Bezorilik moddasi bo‘yicha jinoyat ishi qo‘zg‘atilib, to‘rt kishi qamoqqa olingan.
Dastlabki ma’lumotlarga ko‘ra, 16-iyul kuni ikkinchi guruh vakillari birinchi guruhning ozodlikda qolgan a’zosini kastet va beysbol tayoqchasi bilan urgan. 19-iyul kuni ikkinchi guruhning uch nafar ehtimoliy a’zosi va ular bilan aloqador yana olti fuqaro ushlangan.
Ushlanganlardan biri ijtimoiy tarmoqlarda taqiqlangan diniy materiallarni tarqatgani haqidagi ma’lumot ham tekshirilmoqda. Barcha holatlar yuzasidan tergovga qadar tekshiruv davom etmoqda.
