Shavkat Mirziyoyev Donald Trampni O‘zbekistonga rasmiy tashrif bilan kelishga taklif qildi, deb xabar berdi prezident matbuot xizmati.
Telefon orqali muloqot 7-avgust kuni bo‘lib o‘tdi. Suhbat avvalida Mirziyoyev AQSh prezidentini mamlakat mustaqilligining 250 yilligi bilan tabrikladi.
Matbuot xizmatiga ko‘ra, Tramp O‘zbekiston–AQSh munosabatlarining yuqori darajasini va ikki davlat rahbarlari o‘rtasidagi ishonchli muloqotni qayd etdi. Tomonlar avval erishilgan kelishuvlarning bajarilishi va strategik sheriklikni yanada rivojlantirishni muhokama qildi.
Uch yillik iqtisodiy hamkorlik dasturiga alohida e’tibor qaratildi. Liderlar Amerika–O‘zbekiston ishbilarmonlik va investitsiya kengashining ilk yig‘ilishi, hududlararo aloqalar hamda AQSh fuqarolari uchun vizasiz rejimni ham ko‘rib chiqdi.
Qo‘shma loyihalar fuqaro aviatsiyasi, avtomobilsozlik, konchilik, infratuzilma, energetika, metallurgiya, sun’iy intellekt va raqamli texnologiyalarni qamrab oladi.
Prezidentlar global xavfsizlik, xalqaro va mintaqaviy nizolarni tinch yo‘l bilan hal etish hamda kelgusi ikki tomonlama va ko‘p tomonlama tadbirlar jadvalini muhokama qildi. Trampning ehtimoliy tashrifi sanasi aytilmadi.
