Ilhom Aliyev va Donald Tramp 8-avgust kuni telefon orqali suhbatlashdi, bu haqda Ozarbayjon prezidenti matbuot xizmati xabar berdi.
Yetakchilar Vashington sammitining bir yilligini muhokama qildi. Ularning bahosiga ko‘ra, sammitda imzolangan qo‘shma deklaratsiya hamda Ozarbayjon va Armaniston o‘rtasidagi bitimning paraflanishi mintaqada tinchlikni mustahkamladi.
Tomonlar o‘tgan yil davomida tinchlik jarayoniga zarar yetkazishi mumkin bo‘lgan hodisa yuz bermaganini qayd etdi. Ozarbayjon neft mahsulotlarining Armanistonga eksporti, yuklar tranziti va ikki mamlakat o‘rtasida savdo boshlanishi ijobiy o‘zgarishlar sifatida tilga olindi.
TRIPP transport loyihasi alohida muhokama qilindi. Matbuot xizmatiga ko‘ra, Ozarbayjondagi infratuzilma ishlari yakunlanish arafasida; yetakchilar Armanistonda qurilish tez orada boshlanishiga umid bildirdi.
Aliyev va Tramp ikki tomonlama munosabatlarni ham muhokama qildi. Ular Ozarbayjon va AQSh o‘rtasidagi strategik sheriklik hujjatini tarixiy deb atab, uni mintaqaviy barqarorlikni mustahkamlash bilan bog‘ladi.
Ozarbayjon prezidenti Trampga G20 sammitiga taklif uchun minnatdorlik bildirdi. Tomonlar strategik sheriklik bundan buyon ham rivojlanishiga ishonch bildirdi.
