O‘zbekistonda bir kilogramm palov uchun mahsulotlar to‘plami narxi hududlarga qarab bir yil ichida 7–10% oshdi. Bu 6,4% bo‘lgan rasmiy inflyatsiyadan yuqori.
To‘plam Xorazm va Andijon viloyatlarida eng ko‘p — 10% dan ziyod qimmatlashdi. Xorazm viloyatida uning narxi bir yil avvalgi 106 ming so‘mdan qariyb 118 ming so‘mga yetdi.
Buxoro viloyati va Toshkentda o‘sish 9% dan oshdi, boshqa hududlarda esa taxminan 7% ni tashkil etdi.
2026-yil iyulida eng qimmat to‘plam Toshkentda qayd etildi — 128 730 so‘m. Eng arzon to‘plam Qoraqalpog‘istonda bo‘ldi — 107 396 so‘m.
Hisob-kitobga 700 gramm mol go‘shti, bir kilogramm lazer guruchi, 300 millilitr yog‘, bir kilogramm sabzi, 300 gramm piyoz, 100 gramm no‘xat, 10 gramm zira va 20 gramm tuz kiritilgan.
