O‘zbekiston va Qozog‘iston 10-avgustdan qariyb 20 turdagi mahsulotga qo‘yilgan tarif va notarif cheklovlarni bekor qilishga kelishib oldi.
Tadbirkorlar savdo to‘siqlari masalasini Aqtau shahrida o‘tgan hukumatlararo komissiya yig‘ilishida ko‘tardi. Yechimlar taxminan bir hafta ichida tayyorlandi.
Toshkentdagi biznes-forumda mahsulotlarning aniq ro‘yxati va tovar pozitsiyalarining ikki mamlakat o‘rtasidagi taqsimoti oshkor qilinmadi.
2026-yilning dastlabki besh oyida o‘zaro savdo 37,9% oshdi. Qozog‘iston vakillari O‘zbekistonga qo‘shimcha yetkazib berish salohiyatini 261 ta tovar pozitsiyasi deb baholadi.
Mamlakatlar yillik savdo aylanmasini qariyb 5 mlrd dollardan 10 mlrd dollarga yetkazmoqchi.
O‘zbekiston Savdo-sanoat palatasi va Qozog‘istonning «Atameken» Milliy tadbirkorlar palatasi ishchi guruh tuzadi. Guruh logistika va chegaradagi muammolarni bartaraf etish, shuningdek, ikki mamlakat hududlaridagi kompaniyalar uchun hamkorlar topish bilan shug‘ullanadi.
