O‘zbekiston va Yaponiya xalqaro hamkorlik agentligi (JICA) erkin iqtisodiy zonalarni rivojlantirish loyihasining keyingi bosqichlari bo‘yicha bayonnoma imzoladi, deya Investitsiyalar, sanoat va savdo vazirligi xabar berdi.
Imzolashdan oldin vazir Laziz Kudratov JICAning O‘zbekistondagi vakolatxonasi rahbari Sakai Mamoru boshchiligidagi missiya bilan uchrashdi.
Tomonlar texnik hamkorlik loyihasi, to‘g‘ridan to‘g‘ri xorijiy investitsiyalarni jalb etish va mamlakat sanoatini rivojlantirish masalalarini muhokama qildi.
Uchrashuvda JICA diagnostika missiyasi hamda tegishli vazirliklar, idoralar va erkin iqtisodiy zonalar direksiyalari bilan maslahatlashuvlar yakunlari ham ko‘rib chiqildi.
Imzolangan bayonnoma loyihani amalga oshirish bo‘yicha navbatdagi qadamlarni belgilaydi. Vazirlik loyiha O‘zbekiston va Yaponiya hamkorligini mustahkamlashi hamda mamlakatning investitsiyaviy jozibadorligini oshirishini kutmoqda.
