60° janubiy va 60° shimoliy kengliklar oralig‘idagi okean yuzasining o‘rtacha harorati iyulda 20,96°C ga yetdi, deya Copernicus iqlim o‘zgarishi xizmati xabar berdi.
Bu kuzatuvlar tarixidagi eng yuqori iyul ko‘rsatkichidir. 2023-yilda qayd etilgan avvalgi rekord 20,89°C edi.
19-iyundan boshlab butun iyul davomida okean yuzasining kunlik harorati yilning tegishli kunlari uchun eng yuqori bo‘ldi. 31-iyulda u 21,05°C ga yetdi — bu 2024-yil martidagi mutlaq rekorddan 0,04 daraja past.
Iyul oyidagi o‘rtacha ko‘rsatkich barcha kalendar oylar orasida sakkizinchi eng yuqori natija bo‘ldi. Copernicus anomaliyani nafaqat Tinch okeanining ekvatorial qismida rivojlanayotgan El-Ninyo, balki boshqa hududlardagi mavsumiy rekord issiqlik bilan ham bog‘ladi.
Iyul rekordlari Tinch okeanining katta qismida — markaziy ekvatorial hududdan Meksika va Markaziy Amerikaning g‘arbiy sohillarigacha kuzatildi. Bu hududda kuchli va o‘ta kuchli dengiz issiq to‘lqinlari qayd etildi.
Me’yordan yuqori harorat Tinch okeanining shimolida, Shimoliy Atlantikaning g‘arbida va Janubiy yarim shardagi okeanning katta hududlarida ham kuzatildi. Jahon meteorologiya tashkiloti yaqin oylarda El-Ninyo yanada kuchayishini kutmoqda.
