OpenAI 2030-yilgacha hisoblash infratuzilmasiga 750 mlrd dollar sarflashni rejalashtirmoqda, The Wall Street Journal ma’lumotlariga tayangan TechCrunch yozdi. Bu allaqachon kiritilgan sarmoya emas, kelajakdagi xarajatlar va shartnomalar bahosidir.
Eng yirik yangi obyektlardan biri AQSHning Georgia shtati Effingham okrugidagi Project Camellia bo‘ladi. Kampus uchun Georgia Power bilan 3,2 GVt quvvat bo‘yicha shartnoma tayyorlanmoqda; quvvatni 2028–2032-yillarda bosqichma-bosqich ishga tushirish rejalashtirilgan.
Kampus qiymati 20 mlrd dollarga, maydoni esa qariyb 1 400 akr yoki 567 gektarga baholanmoqda. OpenAI loyiha uchun zarur energetika infratuzilmasi va elektr ta’minoti xarajatlarini to‘liq to‘lashini bildirdi.
Kompaniya talab eng yuqori bo‘lgan davrlarda energiya tizimidagi yuklamani 1 GVtgacha kamaytirishni ham va’da qilmoqda. Suv ta’minoti uchun doimiy suv sarfini kamaytirishi kerak bo‘lgan yopiq aylanma tizim rejalashtirilgan.
Hudud oldidagi majburiyatlar 80 mln dollarlik jamoat investitsiyalari va talablarga mos Georgia talabalari uchun 71 mln dollargacha Codex kreditlarini o‘z ichiga oladi. Kompaniya mustaqil yillik audit hamda qurilish va ishga tushirishdan keyingi ish o‘rinlarini ham va’da qilmoqda.
Project Camellia hozircha dastlabki bosqichda. OpenAI infratuzilma bosqichlari, yakuniy dizayn, moliyalashtirish va ekspluatatsiya modelini belgilashi kerak, shu sababli e’lon qilingan parametrlar aniqlashtirilishi mumkin.
