Kaspersky tadqiqotchilari asosan Markaziy Osiyodagi davlat tashkilotlariga hujumlarda OctLurk va SilkLurk bekdorlarini aniqladi, bu haqda kompaniya hisobotida aytilgan.
Hujumlar 2025-yil yanvaridan beri kuzatilmoqda. Aniqlangan jabrlanuvchilar joylashgan davlatlar qatorida O‘zbekiston, Qozog‘iston, Qirg‘iziston, Tojikiston, Afg‘oniston va Suriya ko‘rsatilgan.
Nishonga olingan tashkilotlar sog‘liqni saqlash, ilmiy tadqiqotlar, davlat idoralari, logistika, huquqni muhofaza qilish, shaharsozlik, obyektlarni boshqarish va ta’lim sohalarida ishlaydi.
OctLurk va SilkLurk buyruq qobig‘ini ishga tushirish, fayllar bilan ishlash, tarmoqni skanerlash, hisob ma’lumotlari va elektron xatlarni yig‘ish, tugma bosishlarini qayd etish, brauzer parollarini o‘g‘irlash hamda masofadan kirish uchun qo‘shimcha modullarni yuklay oladi.
Kaspersky o‘rtacha ishonch bilan ikkala dasturni bir xitoyzabon operator boshqaradi, deb baholadi. Biroq tadqiqotchilar bu faoliyatni biror ma’lum guruhga bog‘lay olmadi.
