TechCrunch xabar berishicha, Google hammuassisi Sergey Brin Kaliforniyadagi milliarderlar solig‘iga qarshi chiqayotgan Build a Better California tashkilotiga yana $20 mln ajratdi.
Yangi badal bilan uning kampaniyaga sarflagan mablag‘i $100 mlndan oshdi. Brinning tashabbus bo‘yicha ehtimoliy soliq to‘lovi qariyb $13,3 mlrd deb baholanmoqda.
Proposition 40 taklifi shtatda yashovchi qariyb 200 milliarder boyligiga bir martalik 5 foizlik soliq solishni nazarda tutadi. Mablag‘larning asosiy qismini sog‘liqni saqlash dasturlariga yo‘naltirish rejalashtirilgan; Kaliforniyaning Medicaid dasturi budjet qisqarishlaridan so‘ng $30 mlrdgacha federal mablag‘dan ayrilishi mumkin.
Kaliforniya gubernatori Gavin Newsom ham tashabbusga qarshi chiqdi. U badavlat aholi va kompaniyalar shtatdan ketishidan xavotirda hamda hududiy soliq o‘rniga milliarderlar uchun umummilliy soliq joriy etishni taklif qilmoqda.
“Bugun ofis xodimi merosxo‘r ayolga qaraganda yuqoriroq soliq stavkasini to‘lashi mumkin. O‘ta boylarga aksiyalar portfelini garovga qo‘yib qarz olish va soliqqa tortiladigan daromadni ko‘rsatmaslik imkonini beradigan ‘soliqsiz kredit hayot tarzi’ga chek qo‘yishimiz kerak”, — Gavin Newsom, Kaliforniya gubernatori
Kaliforniyaliklar Proposition 40 bo‘yicha noyabr oyida ovoz beradi. Brin moliyalashtirayotgan tashkilot yangi soliqlar joriy etilishini cheklashi va bu loyihani amalda to‘sib qo‘yishi mumkin bo‘lgan muqobil tashabbuslarni ilgari surdi.
Nvidia hammuassisi Jensen Huang esa teskari pozitsiyani bildirdi. Manba bahosiga ko‘ra, tashabbus qabul qilinsa, u qariyb $8 mlrd soliq to‘lashi kerak bo‘ladi.
“Men bu haqda biror marta ham o‘ylamaganman. Biz Silikon vodiysida yashashni tanladik va ular qanday soliq qo‘llamoqchi bo‘lsa, mayli. Men bunga mutlaqo roziman”, — Jensen Huang, Nvidia hammuassisi
Proposition 40 hozircha taklif bo‘lib qolmoqda: yakuniy qarorni shtat saylovchilari noyabrdagi ovoz berishda qabul qiladi.
