O‘zbekiston prezidenti Shavkat Mirziyoyev tadbirkorlar duch kelayotgan jarimalar, yig‘imlar va boshqa xarajatlarni qayta ko‘rib chiqishni topshirdi.
Hozir 51 ta idora 322 ta yo‘nalish bo‘yicha jarima qo‘llash vakolatiga ega. 2024–2026-yillarda belgilangan sanksiyalarning umumiy summasi qariyb 3 trillion so‘mga yetgan.
Davlat rahbari nazorat organlari avval biznesga qoidabuzarlikni tuzatishda yordam berishi, shundan keyingina jazo qo‘llashi kerakligini ta’kidladi.
Alohida topshiriq eksportchilar xarajatlariga taalluqli. Bir yuk mashinasida gilos jo‘natishda bojxona yig‘imlari, fumigatsiya, sertifikatlash va deklarant xizmatlari qariyb 5 million so‘m turadi.
Vazirlar va tarmoq rahbarlari bir hafta ichida byurokratiya, yig‘imlar va jarimalarni qisqartirish bo‘yicha aniq takliflarni Prezident Administratsiyasiga taqdim etishi kerak.
Yangiobod, Muzrabot, Oltiariq va ayrim boshqa tumanlarda eksport hamda sanoat ishlab chiqarishi bo‘yicha ortda qolish qayd etilgan. Bosh vazir Abdulla Aripovga 17 nafar hokimning lavozimiga loyiqligini ko‘rib chiqish topshirildi.
Viloyat hokimlarining investitsiyalar bo‘yicha o‘rinbosarlari to‘qqiz oy yakunida ko‘rsatkichlar yaxshilanmasa, qat’iy choralar ko‘rilishi haqida ogohlantirildi.
